Chers amis de la Moselle et du vin !

 !!! ANNULATION DE LA FÊTE DU RAISIN ET DU VIN 2020 !!!

Léif Frënn vum lëtzebuerger Wäin,

Den 2. Weekend am September ass et nees esou wäit : dat 70. Gréiwemaacher Drauwen- Wäifest steet virun der Dier. De 6., 7. & 8. September dréit sech op iser schéiner Musel alles ëm dee gudde Wäin a Crémant.

Den Optakt vum Wäifest ass de Kréinungsowend, freides um 20.00 Auer am Centre Culturel. All Joar stellt de Comité des Fêtes ee flotte Show- a Museksprogramm zesummen, deen Dir bei engem gudde Patt „Cuvée de la Reine“ genéisse kënnt. Natierlech ass a bleift den Highlight vum Owend d’Kréinung vun där neier Wäikinnigin.

No 4 Joar Asaz als Prinzessin fir de lëtzebuerger Wäin a Crémant, sinn ech houfreg, deen Owend vun menger Virgängerin Sophie Schons zur 70. Lëtzebuerger Wäikinnigin gekréint ze ginn. An dono kënnt Dir mat mir bei gudder Danzmusek zesumme bis an d’Nuecht era feieren.

Samsdes mëttes geet et a ganz Maacher mat Musek an Animatioun weider, wou fir Grouss an Kleng eppes dobäi ass. D’Iess- a Gedrénksstänn vun de Veräiner suergen de ganzen Dag dofir, dass keen hongereg an duuschtereg bleift.

Owes ass dann déi traditionell Showbandparad um Schweinsmoart, wou Museksgruppen aus verschiddene Länner hiren Optrëtt hunn. Uschléissend ass op der Musel d’Freedefeier, an dono léisst een den Owend an de Stroossen a Gaasse vu Maacher a gudder Gesellschaft auskléngen.

Sonndes um 15.00 Auer wäerten d’Stroosse laanscht d’Musel an a Maacher nees voller Leit sinn, well dann de folkloristesche Cortège mat senge ville Ween a Museksgruppen stattfënnt.

Sou e Fest organiséiert sech natierlech net vum selwen, dofir wëll ech elo schonn dem Comité des Fêtes, der Maacher Gemeen, de Sponsoren, de Veräiner, de Wënzer an alle Leit Merci soen, déi zum gudde Gelénge vun eisem Fest bäidroen.

Et ass mir een grouss Éier, als Wënzermeedchen e ganzt Joar laang d’lëtzebuerger Wënzer an hir qualitativ héichwäerteg Produkter heiheem an am Ausland kënnen ze vertrieden. Als 70. lëtzebuerger Wäikinnigin wäert ech verséichen, meng Charge bestméiglech, voller Freed an Engagement ze erfëllen.

Ech hoffen Iech all am September zu Gréiwemaacher begréissen ze kënnen a mat Iech unzestoussen !

Prost op dat 70. Drauwen- a Wäifest !

Jessica